គណៈគ្រូពេទ្យកម្ពុជា | Medical Council of Cambodia | Cambodian Medical Council

អំពីការចុះបញ្ជិកា

តើការចុះបញ្ជិកាគឺជាអ្វី?

យោងតាមមាត្រា១នៃព្រះរាជក្រឹត្យលេខសន/រកត/០២០០/០៣៩ “គ្រូពេទ្យទាំងអស់ដែលប្រកបវិជ្ជាជីវៈវេជ្ជសាស្ត្រនៅប្រទេសកម្ពុជាត្រូវតែសុំចុះបញ្ជិកាជាមួយគណៈគ្រូពេទ្យ”។ ដូច្នេះ ការចុះបញ្ជិកានេះ គឺជាកាតព្វកិច្ចរបស់គ្រូពេទ្យទាំងអស់ទាំងគ្រូពេទ្យខ្មែរនិងគ្រូពេទ្យបរទេសដែលប្រកបវិជ្ជាជីវៈវេជ្ជសាស្ត្រក្នុងប្រទេសកម្ពុជា។

តើនឹងមានអ្វីកើតឡើងបើខ្ញុំមិនបានចុះបញ្ជិកា?

គ្រូពេទ្យដែលមិនបានចុះបញ្ជិកានឹងគ្មានសិទ្ធិប្រកបវិជ្ជាជីវៈវេជ្ជសាស្ត្រនៅក្នុងប្រទេសកម្ពុជាពោលគឺការប្រកបវិជ្ជាជីវៈរបស់លោក-លោកស្រីត្រូវបានចាត់ទុកថាជាការប្រកបវិជ្ជាជីវៈខុសច្បាប់។ការប្រកបវិជ្ជាជីវៈមិនស្របច្បាប់នេះត្រូវបានហាមឃាត់ (លោក-លោកស្រីនឹងរងនូវផលវិបាកជាមិនខាន)។

តើការចុះបញ្ជិកាផ្តល់ផលប្រយោជន៍អ្វីខ្លះដល់រូបខ្ញុំ?

បេសកកម្មរបស់គណៈគ្រូពេទ្យគឺការពារសុវត្ថិភាពរបស់អ្នកជំងឺនិងគាំទ្រគ្រូពេទ្យ។នៅពេលដែល លោក-លោកស្រីបានចុះបញ្ជិកាជាមួយគណៈគ្រូពេទ្យលោក-លោកស្រីនឹងទទួលបានសិទ្ធិប្រកបវិជ្ជាជីវៈវេជ្ជសាស្ត្រនៅក្នុងប្រទេសកម្ពុជាទៅតាមប្រភេទនៃបញ្ជិកាដែលលោក-លោកស្រីបានទទួល។លោក-លោកស្រីក៏នឹងត្រូវបានការពារពីអំពើរំលោភបំពានផ្សេងៗ។ក្នុងករណីនៃវិវាទដែលត្រូវដោះស្រាយនៅតុលាការគណៈគ្រូពេទ្យមានកាតព្វកិច្ចចូលរួមផ្តល់យោបល់ចំពោះមុខតុលាការ(មាត្រា៦នៃព្រះរាជក្រឹត្យ)។គណៈគ្រូពេទ្យក៏មានកាតព្វកិច្ចធ្វើរបាយការណ៍លើអធិករណ៍ដែលបានកើតឡើង(មាត្រា១៨នៃព្រះរាជក្រឹត្យ) ដើម្បីបញ្ជាក់ពីការពិតជាក់ស្តែង នៃការប្រព្រឹត្តិរបស់គ្រូពេទ្យនោះ។ចំពោះការប្រតិបត្តិដែលបានបំពានលើក្រមសីលធម៌វិជ្ជាជីវៈនឹងត្រូវបានទទួលវិន័យទៅតាមលក្ខណៈនៃកំហុសដែលបានប្រព្រឹត្ត(មាត្រា២៦នៃព្រះរាជក្រឹត្យ)។

តើការចុះបញ្ជិការបស់ខ្ញុំមានសុពលភាពរយៈពេលប៉ុន្មាន?

រយៈពេលសុពលភាពនៃការចុះបញ្ជិកាប្រែប្រួលទៅតាមប្រភេទនិមួយៗ(ប្រភេទក ខ គ ឃ និង ង) និងប្រាក់ភាគទានដែលបានបង់។ សម្រាប់ព័ត៌មានបន្ថែម សូមអាន សេចក្តីសម្រេចក្នុងការកំណត់ប្រភេទនៃការចុះបញ្ជិកាដែលមាននៅwww.mcc.org.kh។ គ្រូពេទ្យដែលចុះបញ្ជិកាប្រភេទកខ ឬ ង អាចមានសិទ្ធិសុំចុះបញ្ជិកាសម្រាប់រយៈពេល៣ឆ្នាំ អាស្រ័យលើប្រាក់ភាគទានដែលបានបង់ក្នុងពេលសុំចុះបញ្ជិកា(បង់ប្រាក់ភាគទានសម្រាប់មួយឆ្នាំ មានសុពលភាពត្រឹមមួយឆ្នាំ)។ចំពោះគ្រូពេទ្យដែលបានចុះបញ្ជីនិងបង់ប្រាក់ភាគទានដំបូងប្រចាំឆ្នាំ២០១២នៅមុនថ្ងៃទី៣១ ខែធ្នូ ឆ្នាំ២០១២នឹងបានទទួលវិញ្ញាបនបត្របញ្ជាក់ការចុះបញ្ជិកាដែលមានសុពលភាពរហូតដល់ថ្ងៃ ទី៣១ខែ ធ្នូ ឆ្នាំ២០១៣។

តើត្រូវបង់ប្រាក់ភាគទានចំនួនប៉ុន្មានសម្រាប់ការចុះបញ្ជិកាឡើងវិញ?

គ្រូពេទ្យម្នាក់ៗត្រូវចុះបញ្ជិកាឡើងវិញទៅតាមសេចក្តីណែនាំសម្រាប់ប្រភេទនៃការចុះបញ្ជិការបស់ខ្លួន។ការមិនបានចុះបញ្ជិកា គ្រូពេទ្យមិនអាចប្រកបវិជ្ជាជីវៈវេជ្ជសាស្ត្របានទេ។វាជាការទទួលខុសត្រូវរបស់គ្រូពេទ្យគ្រប់រូបក្នុងការធានាថា ការចុះបញ្ជិការបស់ខ្លួនត្រូវបានរក្សាឲ្យនៅមានសុពលភាពជានិច្ច។

សំនួរសួរជាញឹកញាប់

ប្រសិនបើខ្ញុំជាគ្រូពេទ្យធ្វើការងារក្នុងផ្នែកសុខភាពសាធារណៈហើយខ្ញុំមិនធ្វើការពិនិត្យព្យាបាលជំងឺទេតើខ្ញុំនៅតែត្រូវចុះបញ្ជិកាដែរឬទេ?
ត្រឹមត្រូវហើយដ៏រាបណាលោក-លោកស្រីនៅតែប្រើសញ្ញាបត្រវេជ្ជសាស្ត្ររបស់ខ្លួនក្នុងការប្រកបវិជ្ជាជីវៈលោក-លោកស្រីត្រូវតែចុះបញ្ជិកា។

ប្រសិនបើខ្ញុំជាគ្រូពេទ្យធ្វើការងារដែលមានពាក់ព័ន្ធនិងវិស័យសុខាភិបាលក្នុងក្រសួងផ្សេងក្រៅពីក្រសួងសុខាភិបាល តើខ្ញុំនៅតែត្រូវចុះបញ្ជិកាដែរឬទេ?
គ្រូពេទ្យទាំងអស់ដែលធ្វើការងារសុខាភិបាលជាសុខភាពសាធារណៈក្តីជាគ្រូពេទ្យដែលធ្វើការពិនិត្យព្យាបាលជំងឺក្តី ត្រូវតែចុះបញ្ជិកា ទោះបីស្ថិតនៅក្រៅក្រសួងសុខាភិបាលក៏ដោយ។

ប្រសិនបើខ្ញុំជាគ្រូពេទ្យធ្វើការងារទាក់ទងនឹងការងារសុខភាពក្នុងផ្នែកយោធាឬនគរបាល តើខ្ញុំត្រូវចុះបញ្ជិកាដែរឬទេ?
គ្រូពេទ្យទាំងអស់ដែលធ្វើការងារក្នុងផ្នែកយោធាឬ នគរបាលទាំងការងារពិនិត្យព្យាបាលជំងឺឬសុខភាពសាធារណៈ ត្រូវតែចុះបញ្ជិកាជាមួយគណៈគ្រូពេទ្យ។

ប្រសិនបើខ្ញុំជាគ្រូពេទ្យធ្វើការងារនៅក្នុងមន្ទីរពេទ្យសាធារណៈប៉ុន្តែខ្ញុំមិនមានធ្វើការងារពិនិត្យព្យាបាលជំងឺឯកជនទេ តើខ្ញុំត្រូវតែចុះបញ្ជិកាឬទេ?
ពិតហើយទោះជាគ្មានធ្វើការងារពិនិត្យព្យាបាលជំងឺឯកជនក៏ដោយ គ្រូពេទ្យទាំងអស់ដែលប្រកបវិជ្ជាជីវៈវេជ្ជសាស្ត្រនៅតែត្រូវចុះបញ្ជិកា។

ប្រសិនបើខ្ញុំជាគ្រូពេទ្យធ្វើការងារពិនិត្យព្យាបាលជំងឺនៅក្នុងផ្នែកឯកជន ប៉ុន្តែរូបខ្ញុំមិនមែនជាម្ចាស់ស្ថាប័ននោះទេ តើខ្ញុំត្រូវតែចុះបញ្ជិកាដែរឬទេ?
លោក-លោកស្រីត្រូវតែចុះបញ្ជិកា។ ការចុះបញ្ជិកាគឺជាតម្រូវការសម្រាប់គ្រូពេទ្យទាំងអស់ដែលប្រើប្រាស់សញ្ញា បត្រវេជ្ជសាស្ត្រក្នុងការប្រកបវិជ្ជាជីវៈវេជ្ជសាស្ត្ររបស់ខ្លួន។

ប្រសិនបើខ្ញុំជាគ្រូពេទ្យធ្វើការងារនៅមន្ទីរសុខាភិបាលឬការិយាល័យស្រុកប្រតិបត្តិ និងមិនធ្វើការពិនិត្យព្យាបាលជំងឺទេ តើខ្ញុំត្រូវតែចុះបញ្ជិកាដែរឬទេ?
គ្រូពេទ្យទាំងអស់ដែលធ្វើការងារផ្នែកសុខភាពសាធារណៈត្រូវតែចុះបញ្ជិកា ដោយមិនគិតថាតើគ្រូពេទ្យនោះ មានធ្វើ ឬ មិនមានធ្វើការងារពិនិត្យព្យាបាលជំងឺទេ។គ្រូពេទ្យខ្មែរទាំងអស់ដែលធ្វើការងារនៅមន្ទីរសុខាភិបាល និងនៅការិ យា ល័យស្រុកប្រតិបត្តិដែលមិនធ្វើការងារពិនិត្យព្យាបាលជំងឺនិងគ្មានផែនការចាប់ផ្តើមធ្វើការងារពិនិត្យព្យាបាលជំងឺទេត្រូវតែចុះបញ្ជិកាក្នុងប្រភេទង។ ប៉ុន្តែ បើលោក-លោកស្រីមានបំណង ចាប់ផ្តើមធ្វើការងារពិនិត្យព្យាបាលជំងឺវិញបន្ទាប់ពីបានផ្អាកធ្វើការងារនេះរយៈពេលបីឆ្នាំហើយនោះលោក-លោកស្រី ត្រូវតែចុះបញ្ជិកាក្នុងប្រភេទក។គ្រូពេទ្យខ្មែរទាំងអស់ដែលធ្វើការងារនៅមន្ទីរសុខាភិបាលនិងនៅការិយាល័យសុខាភិបាលស្រុកប្រតិបត្តិនិងថែមទាំងមានធ្វើការងារពិនិត្យព្យាបាលជំងឺនៅក្នុងផ្នែកឯកជនទៀតត្រូវតែចុះបញ្ជិកាក្នុងប្រភេទខ។

ប្រសិនបើខ្ញុំជាគ្រូពេទ្យតែខ្ញុំមិនមែនកំពុងធ្វើការងារក្នុងវិស័យសុខាភិបាល តើខ្ញុំនៅតែត្រូវចុះបញ្ជិកាទៀតឬទេ?
ទេ!ប្រសិនបើលោក-លោកស្រី កំពុងប្រកបវិជ្ជាជីវៈផ្សេងពីវេជ្ជសាស្ត្រឬសុខភាពសាធារណៈទាំងស្រុងលោក-លោកស្រីនឹងមិនត្រូវចុះបញ្ជិកាជាមួយគណៈគ្រូពេទ្យទេ។ប៉ុន្តែប្រសិនបើលោក-លោកស្រីចង់ប្រកបវិជ្ជាជីវៈជាគ្រូពេទ្យឬក្នុងផ្នែកសុខភាពសាធារណសារជាថ្មីលោក-លោកស្រីត្រូវចុះបញ្ជិកាឡើងវិញ។ការចុះបញ្ជិកាឡើងវិញនេះនឹងមានលក្ខខណ្ឌខ្លះ ដោយលោក-លោកស្រីមិនបានធ្វើការពិនិត្យព្យាបាលជំងឺយូរមកហើយ។

ខ្ញុំបានបង់ប្រាក់ភាគទានចុះបញ្ជីរបស់ខ្ញុំរួចហើយប៉ុន្តែខ្ញុំមិនទាន់បានបំពេញទម្រង់បែបបទសុំចុះបញ្ជិការបស់ខ្ញុំនៅឡើយទេតើនេះចាត់ទុកថាខ្ញុំបានចុះបញ្ជិការួចជាស្ថាពរហើយឬ?
ទេ!ដើម្បីចាត់ទុកថាបានចុះបញ្ជិកា លោក-លោកស្រីត្រូវតែបានទទួលវិញ្ញាបនបត្របញ្ជាក់ការចុះបញ្ជិកាដែលចេញដោយគណៈគ្រូពេទ្យជាតិកម្ពុជា។សម្រាប់ព័ត៌មានលម្អិត សូមមើលចម្លើយទៅនឹងសំនួរ “តើការចុះបញ្ជិកាមានដំណើរការយ៉ាងដូចម្តេច?”

ប្រសិនបើខ្ញុំធ្វើការងារជាមួយអង្គការមិនមែនរដ្ឋាភិបាល ឬអង្គការអន្តរជាតិរយៈពេលពីរសប្តាហ៍ តើខ្ញុំត្រូវតែចុះបញ្ជិកាដែរឬទេ?
គ្រូពេទ្យទាំងអស់ដែលចង់ធ្វើការងារនៅក្នុងប្រទេសកម្ពុជាត្រូវតែចុះបញ្ជិកាទោះបីជាគាត់ធ្វើការរយៈពេលតែមួយ សប្តាហ៍ក៏ដោយ។

តើមានតម្រូវការអ្វីខ្លះក្នុងការចុះបញ្ជិកាឡើងវិញ?
ដើម្បីចុះបញ្ជិកាឡើងវិញក្នុងឆ្នាំបន្ទាប់ គ្រូពេទ្យគ្រប់រូបត្រូវតែបំពេញនូវលក្ខខណ្ឌនៃការបណ្តុះបណ្តាលវេជ្ជសាស្ត្របន្ត(Continuing Medical Education[CME]) យ៉ាងសមស្របទៅតាមប្រភេទនៃការចុះបញ្ជិការបស់ខ្លួនពោលគឺគ្រូពេទ្យម្នាក់ៗត្រូវស្វែងរកពិន្ទុ ឬ Credit CMEអប្បបរមាជារៀងរាល់ឆ្នាំ។ ការចុះបញ្ជិកាឡើងវិញនឹងត្រូវការពិន្ទុCMEទាំងនេះ។ សកម្ម ភាពដែលអាចទទួលបានពិន្ទុ រួមមានការចូលរួមការប្រជុំគ្លីនិក និងសិក្ខាសាលាប្រចាំនៅមន្ទីរពេទ្យការបណ្តុះបណ្តាល ឬសន្និបាតដែលត្រូវបានទទួលស្គាល់ (អាចជាការបណ្តុះ បណ្តាលដែលមានរយៈពេលកន្លះថ្ងៃ ឬលើសពីនេះ)ការធ្វើការបោះពុម្ភផ្សាយ(ការសិក្សាស្រាវជ្រាវ គោលការណ៍ណែ នាំ)ការធ្វើបាឋកថា ។ល។ព័ត៌មានលម្អិតអំពីលក្ខខណ្ឌ CME សកម្មភាពបណ្តុះបណ្តាលផ្សេងៗនិងពិន្ទុនឹងមានដាក់បញ្ចូលក្នុងគេហទំព័រគណៈគ្រូពេទ្យកម្ពុជា www.mcc.org.kh។